चितवन । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनलाई लक्षित गर्दै चितवनमा व्यापक सुरक्षा व्यवस्था मिलाइने भएको छ। महाधिवेशनको अवधिभर शान्ति सुरक्षा कायम राख्न ठूलो संख्यामा सुरक्षाकर्मी परिचालन गर्ने तयारी गरिएको प्रहरीले जनाएको छ।

असार ७ देखि ९ गतेसम्म भरतपुरमा सञ्चालन हुने महाधिवेशनका लागि १ हजार ८७ जना नेपाल प्रहरी खटाइने योजना बनाइएको छ। कार्यक्रमस्थल तथा आसपासका क्षेत्रको सुरक्षा व्यवस्थापनलाई प्रभावकारी बनाउन विशेष सुरक्षा रणनीति लागू गरिने जनाइएको छ।

यस्तै, सवारी साधनको चाप व्यवस्थापन गर्न १६५ जना ट्राफिक प्रहरी परिचालन गरिनेछ। महाधिवेशनमा देशभरबाट सहभागीहरू आउने भएकाले सडकमा हुने सम्भावित भीडभाडलाई ध्यानमा राख्दै पार्किङ व्यवस्थापन तथा ट्राफिक सञ्चालनका लागि आवश्यक तयारी गरिएको छ।

प्रहरीका अनुसार कार्यक्रम अवधिभर सुरक्षा निगरानी बढाइनेछ भने सहभागी तथा सर्वसाधारणलाई सहज आवतजावतको वातावरण सुनिश्चित गर्न विभिन्न स्थानमा विशेष व्यवस्थापन गरिनेछ।

रास्वपाले बन्दसत्रमा करिब ३ हजार ५०० देखि ४ हजार प्रतिनिधि सहभागी हुने अनुमान गरेको छ। त्यसैगरी उद्घाटन सत्रमा झण्डै ४० हजार समर्थक तथा शुभेच्छुकको उपस्थिति रहने अपेक्षा गरिएको पार्टी स्रोतले जनाएको छ।

महाधिवेशनलाई व्यवस्थित, सुरक्षित र भव्य बनाउन सुरक्षा निकाय, स्थानीय प्रशासन तथा सम्बन्धित निकायबीच आवश्यक समन्वय भइरहेको बताइएको छ।